प्रचण्डको विरोधमा प्रदर्शन, १७ जना पक्राउ

वीरगंज/१२ चैत – वीरगंज महोत्सव व्यापार मेलाको उद्घाटन गर्न वीरगंज आएका प्रचण्डलाई शुक्रवार ठाउँठाउँमा कालोझन्डा देखाइयो । सिमराबाट पौने १ बजे वीरगंज आइपुगेका अध्यक्ष प्रचण्डलाई घण्टाघरमा मधेसवादी दलहरूले कालोझन्डा देखाएका हुन् ।
त्यसैगरी महोत्सवस्थल आदर्शनगरमा पनि कालोझन्डा देखाइएको थियो । प्रचण्डको आगमनअघि मधेसकेन्द्रित दलका नेता, कार्यकर्ताहरूले बिहानैदेखि घण्टाघर, मुर्ली, पावरहाउस, परवानीपुरलगायतका ठाउँमा नारबाजी गर्दै विरोध प्रदर्शन गरेका थिए ।
बिहान ११ बजे राष्ट्रिय मधेसी समाजवादी पार्टीका केन्द्रीय सदस्य राजेशमान सिंहको नेतृत्वमा वीरगंज बजार बन्द गराउने प्रयास भएको थियो । बन्द गराउने क्रममा बन्दकर्ताहरूलाई प्रहरीले पक्राउ गरेको थियो । पर्साका प्रहरी उपरीक्षक राजुबाबू श्रेष्ठले तीन महिलासहित १७ जना पक्राउ परेको बताए । उनले पक्राउ परेकाहरूलाई के गर्ने भन्ने विषयमा सल्लाह भइरहेको प्रतीकलाई बताए ।
पक्राउ पर्नेहरूमा केस सिंह, रवि सर्राफ, मुन्नी श्रीवास्तव, रेखा साह, स्टार बिटु, प्रदीप चौरसियालगायत रहेका छन् ।
-Prateek Daily-