‘सुपरहिट’बाट विनिता बरालको कम्ब्याक

एकताका असाध्यै चर्चित भएकी अभिनेत्री विनिता बराल दुई वर्षदेखि फिल्म क्षेत्रबाट हराएकी छिन्। फिल्म क्षेत्रबाट अर्ग्यानिक तरकारी खेतीतिर लागेकी उनी केही समयदेखि भने नेपालबाटै हराइरहेकी छिन्।

कृषि अध्ययनका लागि भन्दै उनी अमेरिका पुगेकी छिन्। चाँडै फिल्ममा भने विनिता फेरि देखिँदै छिन्। अमेरिकाबाट उनी फर्किने/नफर्किने टुंगो नलागे पनि पहिल्यै अभिनय गरेको फिल्म ‘सुपरहिट’ रिलिजको तयारी भने बल्ल गरिएको छ।

उक्त फिल्मलाई सुपरहिट बनाउन विनिताले झण्डै एक वर्ष खर्चे पनि निर्माण युनिटले रिलिजको संकेत देखाएन। निर्माण भएको दुई वर्षपछि रिलिजको तयारी गरिएको छ। माघ २२ मा रिलिज गर्ने तयारी गरिएको फिल्मको मंगलवार टिजर तथा पोस्टर सार्वजनिक गरिएको थियो।

‘चपली हाइट’ फिल्मबाट हिट भएकी विनिताको फिल्म करिअर ‘फुलस्टप’ असफल भएर फुलस्टप नै लागेको थियो।

-Nagariknews-