राजेन्द्र महतो मध्यराति बिपी प्रतिष्ठानमा भर्ना

धरान : विराटनगरको जोगवनी नाका ठप्प पार्न धर्नामा बस्ने क्रममा प्रहरीसँगको झडपमा घाइते भएका सद्भावना पार्टीका अध्यक्ष राजेन्द्र महतोलाई आइतबार मध्यराति धरानस्थित बिपी कोइराला स्वास्थ्य विज्ञान प्रतिष्ठानमा गरिएको छ ।

प्रहरीले मलाई मार्न खोजेका थिए : महतो

विराटनगरको गोल्डेन अस्पतालमा उपचार गराइरहेका महतोलाई आइतबार मध्यराति थप उपचारका लागि बिपी प्रतिष्ठानमा भर्ना गरिएको हो ।

दिउँसो प्रतिष्ठान भर्ना गर्दा स्थानीयबासिन्दाले आक्रमण गर्ने डरले महतो स्वास्थ्य मन्त्री छँदा सिफारिस भइ नियुक्ति प्रतिष्ठानको उपकुलपतिमा नियुक्ति पाएका बलभद्र दासको सिफारिसमा उनलाई प्रतिष्ठानमा भर्ना गरिएको हो ।

गोल्डेन अस्पतालबाट रेफर भएपछि उपकुलपति दासले प्रतिष्ठानको आईसीयू खाली गर्न लगाइ आकष्मिक कक्षमा भर्ना नगरी सिधै आईसीयूमा भर्ना गरेको प्रतिष्ठानका एक चिकित्सकले बताए ।

स्वास्थ्य अवस्था सामान्य रहेका महतोलाई आईसीयूमा पाँच घन्टा राखेर उपचार गरेपछि सोमबार विहान पेइङ वार्डमा सारेर उपचार भैरहेको छ ।

महतो स्वास्थ्यमन्त्री रहेका बेला प्रतिष्ठानको उपकुलपति बनाएको गुण तिर्न दासले महतोलाई उपचारका लागि प्रतिष्ठान भर्ना गरेको बुझिएको छ ।

टाउको, हात र खुट्टाका विभिन्न भागमा चोट लागेका महतोको प्रतिष्ठानको न्युरो सर्जन र अर्थोपेडिक्स चिकित्सकहरुले उपचार गरिरहेका छन् ।

प्रहरीले मलाई मार्न खोजेका थिए : महतो
अस्पतालमै सञ्चारकर्मीसँग कुरा गर्दै महतोले शान्तिपूर्ण धर्नामा बसेको अवस्थामा प्रहरीले लाठी प्रहार गरी मार्न खोजेको बताए ।

प्रहरीले आक्रमण गर्न थालेपछि पार्टीका केन्द्रिय सदस्य तेन्जिङ लामाले प्रतिकार गरी आफूलाई बचाएको उनले प्रतिक्रिया दिएका छन् ।

‘प्रहरीले मलाई मार्ने उद्धेश्यले लाठी प्रहार गरिएको थियो’, महतोले भने, ‘धन्न कार्यकर्ताले प्रतिकार गरी जोगाएले बाँच्न सफल भएँ ।’

मधेस आन्दोलन र नाकाबन्दीबारे सञ्चारकर्मीहरुको जिज्ञासामा भने महतोले बोल्न चाहेनन् । महतोको प्रतिष्ठानमा प्रहरी निगरानीमा उपचार भैरहेको छ । उनको अवस्था सामान्य रहेको चिकित्सकहरुले जनाएका छन् ।
– Annapurnapost-