‘नयाँशक्ति’को दुई दिने भेला आजदेखि राजधानीमा

६ मंसिर, काठमाडौं । डा. बाबुराम भट्टराई समर्थित पूर्वएमाओवादी नेताहरुले आज राजधानीमा नयाँ शक्ति निर्माण अभियानको दुई दिने भेला आयोजना गरेका छन् । चाबहिलमा आयोजित भेलाको नाम ‘नयाँ शक्ति निर्माण अभियान उदघाटन समारोह’ राखिएको छ ।भेलामा विभिन्न जिल्लाबाट एमाओवादी छाडेका बाबुराम भट्टराई पक्षधर एमाओवादी नेता कार्यकर्ताहरु सहभागी हुने बताइएको छ ।

आइतबार उदघाटन शत्रमा शुभकामना मन्तव्यका लागि नागरिक समाजका अगुवा, स्वतन्त्र वुद्धिजीवी एवं पत्रकारहरुलाई समेत बोलाइएको नयाँ शक्तिका अभियन्ता देवेन्द्र पौडेलले अनलाइनखबरलाई बताए ।

‘कार्यक्रमको पहिलो दिन स्वतन्त्र व्यक्तिहरुले पनि शुभकामना दिनुहुने छ, दोस्रो दिन अभियन्ताहरुबाट विभिन्न सुझावहरु लिइनेछ,’ पौडेलले भेलाको कार्यसूचीबारे जानकारी दिँदै भने, ‘यो भेला कुनै पार्टी कमिटी गठन गर्नका लागि हुन लागेको हैन, यहाँबाट कुनै नयाँ पार्टी घोषणा गरिने छैन ।’

भेलामा एमाओवादी छाडेको डा. बाबुराम भट्टराई र त्यसपछि सामुहिकरुपमा एमाओवादी पार्टी परित्याग गरेका नेता कार्यकर्ताहरुको सहभागिता रहनेछ ।

भेलाबारे अनलाइनखबरसँग कुरा गर्दै डा. बाबुराम भट्टराईले भनेका छन्,’मैले विभिन्न जनसमुदायसँग सुझावहरु लिइरहेको छु, यही सिलसिलामा पूर्वमाओवादी कार्यकर्ताहरुबाट पनि सुझाव संकलन गर्न लागिएको मात्र हो, यो कुनै पूर्वगुटको राष्ट्रिय भेला होइन ।’
-Onlinekhabar-